2Cor 8 | PONPDN | STEP | RI ai kan, se men padaki on komail duen mak en Kot en momodisou en Masetonien akan, duen ar kikiwei;

2 Corinthians 8

1 RI ai kan, se men padaki on komail duen mak en Kot en momodisou en Masetonien akan, duen ar kikiwei; 2 Pwe ar kalokolok meid laud, o irail pil meid samama, ari so, mepukat imwilan peren o mairon laud, 3 Pwe ai kadede irail, me re kida duen me re kak on o laude suri. 4 Pein irail inon ion ap nidenideki on kit, en ale ar kisakis, o ar ian sauasa kisakis wet on saraui kan. 5 O re wiadar mepukat, kaidin duen at kaporoporeki, a re ki on Kaun o pein irail mas, ap pil on kit pan kupur en Kot. 6 Kit ari panaui Titus en kanikiela mak wet re omail duen a tapiadar mas o. 7 A duen omail kapwapwaki son karos: Ni poson o masan, o lolekon, o porisok, o omail limpok on kit, iduen komail pil inon ion, en kapwapwa ni mak wet. 8 I indai on komail met, kaidin kusoned eu, a pweki porisok en me tei kan, o i kin kasoneson omail limpok, ma a pun de so. 9 Pwe komail asaer mak en atail Kaun Iesus Kristus, duen a kapwapwa, ap samamalar pweki komail, pwe komail en kapwapwa kila i. 10 A iet ai lamelam me i men kasaleda, a meid katepa on komail, pwe komail tapiadar inon ion ap pil kapwaiada dodok mau wet ni par samalar. 11 Komail ari kanikiela dodok wet, pwe duen omail men ian onop, iduen komail en wiada san ni omail kapwapwa. 12 A ma amen inon ion, ian dodok wet, a pan konekonela duen me a pan kak on, kaidin duen me a sota kak on. 13 Pwe irail ender mararaki, a komail id toutouki; a karos en parok pena. 14 Pwe ansau wet omail kapwapwa en kaitar arail samama, a arail kapwapwa en kaitar omail samama, pwe karos en parok pena. 15 Duen a intintidier: Me rik penaer mo toto, a sota men nak, o me rik penaer me malaulau, a sota kin dupok. 16 Danke on Kot, me kotin kainon ion monion en Titus; 17 Pwe a duki on at poeki, a pil pein i inon ion madan pwar won komail. 18 A kit pil kadar wei ri atail ol ian i, me indandeki a padaki wei ronamau ni momodisou kan karos. 19 A kaidin i eta, pwe momodisou kan pil piladar i, en ian kit papaki mak wet, me kit kin apapwali on kalinanada Kaun o kapina omail inon ion mau. 20 Kanakanai on, pwe amen de kasapune kin kit at paki kisakis laud wet, 21 Kit pil kin masamasan, pwe karos en inen, kaidin mon Kaun eta, pwe pil mon aramas akan. 22 A kit kadar ir wei ianaki ri atail o, me diarokadar ni son toto, me a porisok, a ansau wet a porisok san mas ni a liki komail. 23 Ari, ma amen pan idok duen Titus, i ai warok o sauasa pai re omail; a duen ri atail akan, irail me men en kadar en momodisou kan o linan en Kristus. 24 Komail ari kasansale on irail mon momodisou kan omail limpok ni omail apapwali irail duen i kapina kin komail.